Puisi Sunda "Korona"

Alam dunya meuni gempar..
Ku panyakit anu anyar..
Korona ceuk beja nular..
Manusa jadi salasar..

Panyakit anu bahaya..
Lain panyakit korona..
Tapi anu sabenerna..
Sieun maot cinta dunya..

Hariwang hirup teu dahar..
Usaha sieun teu lancar..
Hirup sieun henteu benghar..
Kana to'at jadi bangkar..

Nu maot di sangka korban..
Maot na pedah dadakan..
Mayit na teu di urusan..
Geus ninggalkeun ka fardluan..

Poho kana kakuduan..
Nyolatan rejeng nguburkeun..
Ngadusan jeung mungkus kafan..
Eta teu di perhatikeun..

Nyarita na keur Ihtiar..
Bisi panyakit na nular..
Hate na loba teu sadar..
Fiqih,Tauhid geus udar..

Nyaret na leuleuwiheun..
Fiqih na teu di gurukeun..
Ihtiar na di paksakeun..
Nyomot dalil di akurkeun..

Tauhid ukur di talar..
Hate na anggeur teu sadar..
Kana qodo sareng kadar..
Iman na beutah di dasar..

Mubtadi'in na teu leupas..
Hate na teu pati awas..
Hirup na loba ka reuwas..
Loba sangka anu teu pas..

Ilmu Fiqih di pilihan..
Nu cocok nu di teangan..
Nu penting aya qaolan..
Di pake pikeun matwa'an..

Sedeng ari elmu fiqih..
Elmu nu paragi milih..
Nyareat jadi ka panggih..
Ihtiar teu pilih pilih..

Ulah nyangka jabariyah..
Ulah nyangka qodariyah..
Da urang ge can paruguh..
Boa lain ahlussunnah..

Nu sae mah hate sadar..
Maot teh hal nu ilahar..
Najan taya sabab anyar..
Teu kaluar tina qodar..

Kicep manusa di atur..
Nyawa na ge geus di ukur..
Rizqi na moal ku batur..
Bakal jadi Ahli kubur..

Nyareat rejeng Ihtiar..
Sing lempeng dina tujuan..
Seja ibadah Niatan..
Seja ngudag karidloan..

Mugia ieu ujian..
Bisa ningkat ka imanan..
Pasrah ka anu kagungan..
Nyatana ka Dzat pangeran..

Wabah nu di paparinkeun..!
Mugi enggal di singkirkeun..
Umat sing di salametkeun..
Tina teqad nu ngufurkeun..