Ngahontal Cita-cita

 

 

Mimiti kuring asup sakola ka SMP, kuring manggihan kaayaan anu beda jeung suasana waktu kuring sakola di SD. Karasana sakola di SMP mah asa dianggap leuwih dewasa, jeung deui guru anu ngajar oge beda-beda, nurutkeun mata pelajaranana, henteu siga di SD.

 

Kuring ngarasa resep jeung aya rasa sumanget ngamimitian sakola di SMP teh. Kukituna kuring jadi aya pikiran hayang jadi juara kelas. Sabab kacipta meureun mun jadi juara kelas mah babaturan teh, boh lalaki baoh awewe, bakal pada ngadareukeutan ka kuring.

 

Tah ti harita kuring jangji ka diri sorangan, yen kuring teh soson-soson dina diajar, supaya bisa jadi juara di kelas. Eta cita-cita jeung jangji teh ahirna bisa kahontal, kuring dina ahir semester kahiji teh diumumkeun yen kuring jadi juara kelas. Kacida bungahna kuring harita.

 

Anu leuwih ngajadikeun kuring leuwih bungah deui, dina upacara poe Senen, aya pangumuman ti Kepala Sakola ka sarerea murid, mimiti ti kelas tujuh nepi ka kelas salapan, ngeunaan saha-saha bae anu jadi juara juara umum sa sakola, ti mimiti kelas tujuh nepi ka kelas salapan.

 

Kuring kacida bungahna, sabot ngaran kuring disebut jadi juara umum kadua sa sakola SMP. Anu jadi juara umum kahiji nyaeta ti kelas dalapan, anu jadi juara umum kadua nyaeta kuring ti kelas hiji, jeung juara umum katilu ti kelas salapan.

 

Ti sabot harita kuring jadi sadar, yen umpama urang boga cita-cita atawa kahayang, urang kudu soson-soson ngusahakeun pikeun ngahontal eta cita-cita. Umpama urang bisa soson-sonson dina usaha ngahontal hiji cita-cita, eta cita-cita teh bisa kahontal, malahan bisa ngaleuwihan anu dicita-citakeun.