NGAGUAR KECAP RAJÉKAN

 

Titénan kalimah ieu di handap !

(1)    Cara umum paimahan di Éropah, imah di Paris umumna apartemén atawa flat nu rata-rata jangkungna 4-6 lantéy.

(2)    Ulah sok tulas-tulis dina témbok WC !

Kecap rata-rata (1) jeung tulas tulis (2) dina kalimah di luhur téh disebutna kecap rajékan. Kecap rajékan téh nyaéta kecap anu diwangun ku cara nyebut dua kali atawa leuwih wangun dasarna, boh sabagéan atawa sagemblengna. Nyusun kecap rajékan disebutna ngarajék (reduplikasi) .

Kecap rajékan téh jumlahna aya tilu rupa:

1. Kecap rajékan sagemblengna, nyaéta kecap rajékan anu diwangun ku cara nyebut dua kali atawa leuwih kalayan sagemblengna; sora jeung wangun kecapna teu robah. Kecap rajékan sagemblengna aya dua rupa:

(1)    Dwilingga

a.      Dwimurni, nyaéta kecap rajékan anu diwangun ku cara nyebut dua kali sagemblengna wangun dasar bari teu dirobah sorana. Conto: buku-buku, kuda-kudu, jste.

b.      Dwiréka, nyaéta kecap rajékan anu diwangun ku cara nyebut dua kali sagemblengna wangun dasarna bari robah sorana. Conto: bulak-balik, gulang-guling, jsté.

(2)    Trilingga

Kecap rajékan sagemblengna anu diwangun ku cara nyebut tilu kali wangun dasarna bari robah sorana. Contna: dar-dér-dor, blag-blig-blug, jsté.

2. Kecap rajékan sabagéan, nyaéta kecap rajékan anu diwangun ku cara nyebut dua kali sabagean wangun dasarna, boh robah sorana boh henteu. Kecap rajékan sabagéan aya dua rupa:

(1)    Dwipurwa

Kecap rajékan sabagéan anu diwangun ku cara nyebut dua kali engang mimiti wangun dasarna. Contona: tatajong, papaling, jsté.

(2)    Dwimadya

Kecap rajékan sabagéan anu diwangun ku cara nyebut dua kali engang tengah wangun dasarna. Contona: sababaraha nu asalna tina sabaraha.

 

 

Sumber: Panggelar Basa Sunda, SMA/SMK/MA/MAK (2017)